СПАРТЫЎНЫХ АБ’ЕКТАЎ ШМАТ НЕ БЫВАЕ
04.11.2021У чацвер у Валожыне ля фізкультурна-аздараўленчага комплексу ва ўрачыстай абстаноўцы была адкрыта ўніверсальная спартыўная пляцоўка, абсталяванне якой дазваляе аматарам здаровага ладу жыцця займацца валейболам, баскетболам, стрытболам, гуляць у хакей, катацца на каньках.
Старшыня райвыканкама Яўген Круковіч, выступаючы перад прысутнымі, а гэта прадстаўнікі мясцовай улады, жыхары горада, выхаванцы школ і ДЮСШ, педагогі і фізкультурнікі, заўважыў, што спорт, любая фізічная актыўнасць увогуле – важныя складальнікі здароўя і як след – працягласці жыцця чалавека.
Новы спартыўны аб’ект створаны па ініцыятыве райвыканкама пры фінансавай падтрымцы галоўнага ўпраўлення спорту і турызму Мінаблвыканкама.
Ганаровае права правесці цырымонію пераразання сімвалічнай стужкі і тым самым даць старт рабоце пляцоўкі вядучыя ўрачыстасці прадаставілі кіраўніку раёна Яўгену Круковічу, старшыні раённага Савета дэпутатаў Пятру Бібіку і намесніку старшыні райвыканкама Ігару Шакуну.
Са словамі ўдзячнасці да іх звярнуўся дырэктар ДЮСШ Дзмітрый Ажарэльеў.
Турнір па стрытболе сярод выхаванцаў аддзялення баскетбола ДЮСШ стаў лагічным завяршэннем важнага для Валожыншчыны мерапрыемства.