6 верасня адбыўся конкурс юных чытальнікаў Мінскай вобласці “Жывая класіка”
16.9.20146-7 верасня старажытны горад Заслаўе стаў культурна-асветніцкім цэнтрам Беларусі, куды вялі ўсе дарогі… Больш за 25 тысяч чалавек завіталі сюды на штогадовае рэспубліканскае свята – Дзень беларускага пісьменства. Настаўнікі і навучэнцы Валожынскага раёна прынялі актыўны ўдзел у мерапрыемствах.
6 верасня адбыўся конкурс юных чытальнікаў Мінскай вобласці “Жывая класіка”. Прадстаўнікамі Валожынскага раёна з’яўлялася група школьнікаў з Івянецкай сярэдняй школы: Варыга Наталля, Ваўчок Караліна, Абрамовіч Ілля,Сцяпко Аляксей і Асіпацкая Ганна, якіх падрыхтавала да конкурсу настаўніца беларускай мовы і літаратуры Страчынская Людміла Уладзіміраўна.
Вучні вынеслі на суд журы ўрывак з паэмы Аркадзя Куляшова “Прыгоды цымбал”, які прачыталі на памяць па асобах. Твор быў падабраны ў сувязі з 70-годдзем вызвалення Беларусі і 100-годдзем з дня нараджэння Аркадзя Куляшова.
Конкурс адкрывала Міністр інфармацыі Беларусі Лілія Станіславаўна Ананіч. Прысутнічалі шаноўныя госці і дэлегацыі з рознык раёнаў Беларусі. Выступленне івянецкіх школьнікаў гледачы прымалі вельмі прыхільна.
Усе удзельнікі конкурсу былі ўзнагароджаны дыпломамі за подпісам намесніка Прэм’ер – міністра Рэспублікі Беларусь Анатолія Афанасьевіча Тозіка. Акрамя таго галоўны рэдактар газеты “Звязда” А. М. Каралюкевіч уручыў юным чытальнікам падарункі.
7 верасня 2014 года навучэнцы сярэдняй школы №1 г. Валожына, сярэдняй школы № 2 г. Валожына, Ракаўской сярэдняй школы, Суднікаўскай сярэдняй школы прынялі ўдзел у шматлікіх мерапрыемствах, прысвечаных Дню беларускага пісьменства.
Святочныя дзеянні праходзілі адначасова на некалькіх пляцоўках.
На Цэнтральнай плошчы праходзіў фестываль кнігі і прэсы. У парку на гарадскім вале быў адкрыты помнік князю Ізяславу. На дзіцячай пляцоўцы «Вясёлка талентаў» былі арганізаваны майстар-класы па розным дэкаратыўна-прыкладным тэхнікам, выставачныя экспазіцыі дзяржаўных устаноў дадатковай адукацыі, дзіцячых бібліятэк. На імправізаванай пляцоўцы праходзіў фестываль юных чытальнікаў “Як апець гэту зямлю” па творах беларускіх аўтараў, удзел у якім прынялі навучэнка Ракаўскай сярэдняй школы Жадзейка Карына і навучэнка Суднікаўскай сярэдняй школы Супрончык Дар’я. Дзяўчынкі ўзнагароджаны дыпломамі і падарункамі.
У спартыўным гарадку дзеці свае ўменні прадэманстравалі ў шматлікіх гульнях і эстафетах.
Праграма свята была насычанай і цікавай. Прадстаўнікі дэлегацый Валожынскага раёна дадому вярталіся вясёлыя і шчаслівыя. У душы было задавальненне ад таго, што прынялі ўдзел у святочных мерапрыемствах.